KJSFL reportasje i Kvinnheringen

Søkjer hjorteløyve på ideelt grunnlag

Kvinnherad Jeger & Sportsfiskarlag har søkt om å få hand om dei 15 hjorteløyva på Valen og Handeland Gard.

Hordaland Fylkeskommune lyste ut løyva i slutten av mars, og skriv i lysingsteksten at ein i utgangspunktet ønskjer ein femårsavtale. Fristen for å søkja gjekk ut 7. april.

ØNSKJER HJORTELØYVE: Leiar i Kvinnherad Jeger & Sportsfiskarlag, Øystein A. Ynnesdal, vonar fylket ikkje berre ser på kronene når 15 hjorteløyve på Valen og Handeland Gard skal leigast ut.

Opplæring

Kvinnherad Jeger & Sportsfiskarlag (KJSFL) reknar ikkje med å kunna konkurrera på pris, men argumenterer i søknaden med tilbod som vil koma ålmenta til gode.

– Me har små midlar, men ønskjer å kunna tilby medlemene våre jaktopplæring. Det er ikkje lett for ferske jegerar å sleppa til, dersom ein ikkje har familie eller kjenningar i eit eksisterande jaktlag, seier leiar i KJSFL, Øystein A. Ynnesdal.

Av den grunn er det mange som tar jaktprøva som aldri blir aktive jegerar.

Skulle KJSFL få hand om dei 15 løyva, er planen å la ferske jegerar gå saman med erfarne. Ettersøkslaget i Kvinnherad er ei undergruppe av KJSFL. Laget ser mange fordelar ved å kopla ettersøksjegerane med ferske jegerar. Slik kan fleire få innsikt i ettersøksarbeid, og dessutan god kontakt med jegerane i ettersøkslaget.

– Me ønskjer òg å gi tilbod til fysisk handikappa som ønskjer å gå på jakt, legg Ynnesdal til.

Pris

I utlysinga heiter det at tildelinga av løyva vil skje på bakgrunn av ei vurdering av pris og jakterfaring. Fylkeskommunen sin sakshandsamar har ikkje sett på søknadane, men understrekar overfor Kvinnheringen at ein kjem til å halda seg til det som står i utlysinga.

– Men sidan det er tale om løyve på fylket sine eigedom, burde det vore ope for ålmenta, appellerer Ynnesdal.

KJSFL har vel 220 medlemer og til tilslutta Norges Jeger og Fiskeforbund.

Jonn Karl Sætre

jonn.karl@kvinnheringen.no